नेपाल होराइजन्स सम्वाददाता
काठमाडौं, फागुन २६
बार्सिलोनाले मंगलबार राति दस खेलाडीमा सीमित आर्सनललाई ३(१ ले हरायो र युरोपेली च्याम्पियन्स लिगको क्वाटरफाइनल यात्रा तय गर्‍यो । समग्रमा स्पेनी क्लब ४(३ ले अगाडि रह्यो । अर्कोतर्फ साख्तर डोनेस्क पनि पहिलोपल्ट च्याम्पियन्स लिगको अन्तिम आठमा पुगेको छ । बार्सिलोनाका लागि अर्जेन्टिनी विश्व वर्ष खेलाडी मेसीले अर्को उत्कृष्ट प्रदर्शन गरे । बार्सिलोनाको आक्रामक फुटबल अगाडि आर्सनलको डिफेन्स फिक्का देखिएको थियो । पहिलो लेग २(१ ले गुमाएको बार्सिलोनालाई घरमा १(० को जित पर्याप्त रहने थियो ।
यता भारत पनि विश्वकप क्रिकेटमा बुधबार नेदरल्यान्ड्सलाई ५ विकेटले हराउँदै क्वाटरफाइनलनजिक पुगेको छ । भारतले १ सय ९० रनको विजयी लक्ष्य ३६ ओभर तीन बलमा पूरा गर्‍यो । युवराजले नटआउट ५१ रन जोडे । उनले चौका प्रहार गर्दै टिमको विजयी लक्ष्य पार गरे । कप्तान महेन्द्र सिंह धोनीले नटआउट १९ रन जोडे । युवराजले ७३ बलमा सात चौका हाने । भारतका लागि वीरेन्द्र सहवाग र सचिन तेन्दुलकरले उत्कृष्ट सुरुआत गरे । दुवैले पहिलो विकेटका लागि ६९ रनको साझेदारी गरे । सहवागले आक्रामक ब्याटिङ गर्दै २६ बलमा ३९ रन जोडे । उनले पाँच चौका र दुई छक्का प्रहार गरे । तेन्दुलकरले २२ बलमा छ चौका मदतले २७ रन बटुले । उनी विश्वकप क्रिकेटमा २ हजार रन पूरा गर्ने पहिलो खेलाडीसमेत बने ।
गौतम गम्भीरले २८ तथा विराट कोहलीले १२ रन योगदान गरे । भारतले ९९ रनको स्थितिमा चार विकेट गुमाएको थियो । जितसँगै भारतले चार खेलबाट सात अंक जोडेको छ । शीर्षस्थानमा रहेको भारतको क्वाटरफाइनल यात्रा लगभग निश्चित भएको छ ।

   Bookmark